Suðurnesjabær
Líf og fjör í sumar á Bókasafni Suðurnesjabæjar !
Í sumar hvetjum við öll börn í Suðurnesjabæ til að setja á sig ofurhetjuskikkjuna og taka þátt í Sumarlestri almenningsbókasafnanna. Lestur veitir ofurkraft, því meira sem þú lest, því meira lærir þú og skilur.
Sumarlesturinn hefst í júní og verður út júlí. Það má byrja og hætta hvenær sem er, eins og hentar hverjum og einum. Þáttaka er ókeypis.
Á Bókasafni Suðurnesjabæjar færðu sumarlestrarheftið. Það inniheldur 6 lestraráskoranir og skemmtilegt ofurhetjuspil. Í hvert sinn sem áskorun lýkur kvittar foreldri/forráðamaður og lestrarhetjan heimsækir bókasafnið með staðfestinguna til þess að fá límmiða til að líma á spilaborðið. Spilaborðið er mynd af Skarkalabæ. Í Skarkalabæ er allt í rugli! Það þarf að bjarga fólki og furðuverum úr bráðri hættu og það strax! Þú getur verið lestrarhetjan sem bjargar deginum með aðal ofurkraftinum, orðaforðanum! Spilið er samvinnuspil þar sem spilarar hjálpast að við að bjarga fólki og furðuverum í vanda. Spilarar skiptast á að vera hetjan á meðan hinir giska á hverjum/hverju lestrarhetjan ætlar að bjarga á myndinni.
Með hverjum límmiða sjáum við enn betur hvað það er sem er í gangi í Skarkalabæ. Þannig stækkar spilið með hverri lestraráskorun sem lestrarhetjan klárar í sumar.
Dreginn verður út lestrarvinningur vikulega í júní og júlí.
Sumarlestur er tilvalin samverustund fyrir fjölskyldur, við hvetjum foreldra/forráðamenn til að taka þátt í honum, hjálpa börnum sínum við að velja lestrarefni og hafa gaman að.
Auk sumarlesturs verður boðið upp á foreldramorgna, föndur, leik og fjör í sumar.
Opnunartími á bókasafninu er mánudag - fimmtudag kl 10:00-17:30 og föstudag kl. 10-12
-Verið öll velkomin
Sjá dagskrá á facebook síðu Bókasafn Suðurnesjabæjar.