Reykjanesbær
Listaskóli barna 2023
Listaskóli barna!
Listaskóli barna - Skapandi starf fyrir börn fædd 2011 – 2016.
Boðið verður upp á spennandi, hálfs dags, þriggja vikna sumarnámskeið með áherslu á skapandi starf á vegum menningarfulltrúa í samstarfi við Leikfélag Keflavíkur og Félag myndlistarmanna í Reykjanesbæ.
Markmiðið með Listaskóla barna er að skapa þægilegt og gott andrúmsloft þar sem sköpunargáfa barnanna fær að njóta sín. Námskeiðið er tvíþætt þar sem börnin eru annars vegar í Frumleikhúsinu og taka þátt í spuna, fara í hópeflisleiki og vinna að stuttu frumsömdu leikriti sem sýnt er á Listahátíð í lok námskeiðsins. Hins vegar eru börnin í Svarta-Pakkhúsinu þar sem unnið er með skapandi efnivið sem börnin sýna einnig á Listahátíðinni. Á námskeiðinu er alltaf í boði að fara í útiveru en einnig brjótum við upp hefðbundið skipulag ef veður er sérstaklega gott.
Tvö námskeið verða í boði
A) 12. – 30. júní fyrir hádegi kl. 8:30-11:30
B) 12. – 30. júní eftir hádegi kl. 12:30-15:30
Einungis má skrá hvert barn á eitt námskeið. Þátttakendum verður skipt upp í hópa eftir aldri innan hvers námskeiðs og fá börnin að velja með hverjum þau eru í hóp.
Athugið að þak er á fjölda þátttakenda á námskeiðinu svo hægt sé að sinna hverjum og einum eftir bestu getu.
Í lok námskeiðsins er haldin listahátíð, fimmtudaginn 29. júní kl. 10:30 fyrir börn á námskeiðinu fyrir hádegi og kl. 14:30 fyrir börn á námskeiðinu eftir hádegi, þar sem börnin bjóða fjölskyldu og vinum að sjá afrakstur námskeiðsins.
Staðsetning
Höfuðstöðvar Listaskólans verða í Svarta pakkhúsinu að Hafnargötu 2 en jafnframt verður notuð aðstaða í Frumleikhúsinu að Vesturbraut 17. Þátttakendur hefja daginn og ljúka honum í Svarta pakkhúsinu.
Gjald
Námskeiðsgjald er kr. 20.000 og er allt efni innifalið í verðinu.
Innritun
Innritun hefst mánudaginn 8. maí kl. 8:00 á eftirfarandi slóð: https://www.sportabler.com/shop/reykjanesbaer/listaskbarnareyk
Umsjón
Umsjónarmaður Listaskólans er Halla Karen Guðjónsdóttir, verkefnastjóri viðburðahalds hjá Reykjanesbæ, sem haft hefur umsjón með Listaskólanum síðast liðin ár. Leiðbeinendur Listaskólans eru þau Dagbjört Kristinsdóttir, Júlía Mjöll Jensdóttir og Valur Axel Axelsson.